«Эркээйи эргиирэ» программаны олоххо киллэрии

         СР үөрэҕириитин министиэристибэтин 2021 сыл муус устар 29 күнүнээҕи №01-03/690 бирикээһинэн “Арылы кустук” үөрэх тэрилтэлэрин биир ситим холбоһугуттан 12 дьыссаат “Эркээйи эргиирэ” биир кэлим программаны олоххо киллэрэр пилотнай былаһаакка быһыытынан бигэргэммитэ.
Бу дьыл балаҕан ыйын 10 күнүгэр Д.К. Сивцев — Суорун Омоллоон 115 сааһыгар анаммыт «Суорун Омоллоон кэс тыла – 21 уйэ соруктара» диэн Таатта улууһун үөрэҕириитин декадатын сүбэ мунньаҕар иитии үлэтин боппуруостарын дьүүллэһиигэ Таатта улууһун 8 пилотнай дьыссаатын үлэлэрин уоппута кэпсэннэ.
“Арылы кустук” тьютора Тихонова И. М. аныгы цифровой үйэ көлүөнэтин төреебүт тылын байытарга уонна өбүгэ үгэстэрин умсугутуулаахтык тиэрдэргэ иитээччилэр информационнай технологиялары баһылаан оҕо аймах интэриэһинэн үлэлиэхтэрин тоһоҕолоото. Онон, компьютернай программалары баһылыырга анал үөрэхтэри улуус иһинэн тэрийэри туоруоруста. Маны таһынан аныгы төрөппүттэргэ саха сиэрин-туомун билиһиннэрэргэ бу саас төрөппүттэргэ ыытыллыбыт “Айыыһыт үөрэҕэ” zoom-көрсүһүү сылы быһа барар гына былааннанан культуролог идэлээх эбэтэр айылҕаттан айдарыылаах, дьарыктаах дьон үөрэхтэрэ наадатын эттэ.
Ытык-Күөллээҕи “Чуораанчык” оҕону сайыннаран киин сүрүннүүр иитээччитэ Е. А. Мартынова бүттүүн оҕо саадын үлэтигэр “Эркээйи эргиирэ” бырагырааманы анал бырайыактар нөҥүө киллэрэллэрин иһитиннэрдэ, “Дорожнай карта”, оҕону иитиини сүрүннүүр үлэ бырагыраамата оҥоһуллубутун билиһиннэрдэ.
Чөркөөхтөөҕү “Аленушка” оҕону сайыннаран киин иитээччитэ А.А. Филатова бөлөҕүн иитиллээччилэригэр өбүгэ үгэстэрин хайдах билиһиннэрэрин, үлэнэн иитии, төрүт дьарыктар аныгы олоххо суолталарын кэпсээн истээччилэр сэҥээриилэрин ылла.
Ити курдук, үөрэх кыһатыгар оҕону иитии үрдүкү кэрдиискэ таһаарыллыбыт кэмигэр региональнай уонна национальнай уратыны үөрэх эйгэтигэр учуоттуур, көлүөнэ солбугун бэлэмниир туһуттан оҥоһуллубут “Эркээйи эргиирэ” бырагыраама билиҥҥи кэм ирдэбилин толорорго иитээччилэргэ төһүү күүс, инники хардыыга сирдиир эркээйи буолла.

Добавить комментарий

Ваш адрес электронной почты не будет опубликован.